Премьер Дзанайты Барис бабар кодта цæстдарæн куыст фæкарздæр кæнын, бæлццæтты бартæ куыд æххæстгонд цæуынц, æмæ фиддонтæ куыд исынц, уымæ. Ууыл ныхас цыд, æхсæнадон транспорты системæйы рæзты æмæ лæггæдты хæрзхъæддзинад фæхуыздæр кæныны æмбырды. Сæйрагдæр темæ уыд - æхсæнадон транспорты фиддонтимæ баст. Транспорты Комитеты сæрдар Захъаты Алан куыд фехъусын кодта, афтæмæй 1-æгæм августæй фæстæмæ нæ республикæйы æххæст кæнынц акци. Уымæ гæсгæ, фæндаггаг банчы картæйы уылты куы фидай, уæд фидын хъæудзæн 8 сомы къаддæр. Льготæтæм гæсгæ тариф кусдзæн 4 мæйы дæргъы. Профилон ведомствойы разамонæджы хъуыдымæ гæсгæ, æппæт паддзахадон æхсæнадон транспорт ифтонг у валидатортæй. Уыимæ иуæй-иу шофыртæ нырыккон домæнтæ æххæстæй не ххæст кæнынц. Уыцы хъуыддагыл иумæ кусынц транспорты Комитет, фæлхасадмæ цæстдарды управлени, юстицийы Министрад æмæ прокуратурæ. Республикæйы цæрджыты зæрдыл лæууын кæнынц, сæ бон у фæндаггаг фидын цыфæнды хуызы дæр. Уыцы бартæ æххæстгонд куы нæ цæуой, уæд сæ бон у фæлхасадмæ цæстдарды Управленимæ хъаст бахæссын.